"माळ"लेले गजरे

चित्र वेध (चित्र सौजन्य:अनामिक)

"माळ"लेले गजरे

किती छान प्रसन्न वाटतंय नुसतं या भरगच्च गजऱ्यांकडे पाहून.फुलला गंध असतोच..पण गजरा म्हणजे दोऱ्यात ओवलेला सुगंध.आता एकत्र दिसणारे गजरे थोड्या वेळात वेगवेगळे होतील आणि "त्याच्या" फक्त रोमांचक,प्रेमळ भावनेत गुंतून "तिच्या" केसात माळले जातील. हार आणि गजरा यात हा फरक आहे.हार अनेक भावनांमध्ये गुंतलेला असतो.त्यामुळे तो कधी घातला जातो तर कधी चढवला जातो. गजऱ्याचे तसे नाही...तो फक्त माळला जातो.

या प्रत्येक गजऱ्याचा दोरा वेगळा दिसत असला तरी "दोरा" म्हणून तो एकच आहे...आपल्या परमेश्वरासारखा.

प्रत्येक गजरा उद्या कोमेजणार आहे..पण तरीही तो दोघांच्या नात्यातला सुगंध नाजूक भावनेतून दरवळत ठेवेल...निदान गजरा माळण्याच्या क्षणापुरता तरी..आणि नंतर त्या क्षणाच्या जाणिवेतून...दिवस पुढे सरकेल.

निश्चितपणे अनिश्चित आयुष्य असूनही ते गुंफले गेल्यावर, एकमेकांच्या नात्याचा गुंता न करता...अलिप्त राहूनही परस्परांच्या सहवासात दरवळत रहातात.

फुले कोमेजून जातील,शेवटी फक्त गंधभारीत दोरा उरेल...पण मनात नात्याचा गुंफलेला गजरा कायम टवटवीत राहील.

लेखन: मुकुंद इंगळे